घोराही, दाङ। घोराहीको समग्र विकास, समृद्धि, सुशासन, उत्पादन, उद्यमशीलता र रोजगारी प्रवर्द्धन गर्ने उद्देश्यसहित घोराही बनाऔँ अभियान ले आगामी महिनादेखि वडा–वडामा विशेष कार्यक्रम सञ्चालन गर्ने भएको छ। अभियानले घोराही उपमहानगरपालिकाका सबै वडामा पुगेर स्थानीय नागरिक, टोल विकास संस्था, सामाजिक सङ्घसंस्था, किसान, व्यवसायी, युवा, महिला, शिक्षक तथा सरोकारवालासँग प्रत्यक्ष संवाद गर्दै विकासका प्राथमिकता तय गर्ने जनाएको छ।
अभियानअन्तर्गत प्रत्येक वडाको आवश्यकता, सम्भावना र चुनौतीको अध्ययन गरी स्थानीय स्तरमै समाधान खोज्ने, नागरिकका सुझावलाई कार्ययोजनामा रूपान्तरण गर्ने तथा विकासमा सबैको सहभागिता सुनिश्चित गर्ने कार्यक्रम सञ्चालन गरिने संयोजक सबिन प्रियासन चौधरी ले जानकारी दिए।
उनका अनुसार घोराहीसँग कृषि, शिक्षा, स्वास्थ्य, पर्यटन, उद्योग, व्यापार तथा युवा जनशक्तिको पर्याप्त सम्भावना भए पनि योजनाबद्ध कार्यान्वयनको अभावमा अपेक्षित उपलब्धि हासिल हुन सकेको छैन। अब केवल समस्या औँल्याउनेभन्दा पनि समाधानमुखी अभियान सञ्चालन गरेर नागरिकलाई विकासको साझेदार बनाउन आवश्यक रहेको उनले बताए।
"घोराहीको समृद्धि कुनै एक व्यक्ति, संस्था वा सरकारको प्रयासले मात्र सम्भव छैन। हरेक वडा, टोल, नागरिक, किसान, व्यवसायी, युवा, महिला र सामाजिक संस्थालाई एउटै साझा अभियानमा जोडेर मात्रै दिगो विकास सम्भव हुन्छ," चौधरीले भने।
उनले प्रत्येक वडाको आवश्यकता फरक–फरक हुने भएकाले स्थानीय नागरिककै सुझावका आधारमा विकासका प्राथमिकता तय गरिने बताए। कतै सडक, कतै खानेपानी, कतै कृषि बजार, कतै बेरोजगारी वा अन्य समस्या रहेको उल्लेख गर्दै स्थानीय आवश्यकताअनुसार कार्ययोजना निर्माण गरिने उनको भनाइ छ।
अभियानले विशेष गरी युवालाई स्वदेशमै अवसर सिर्जना गर्ने विषयलाई प्राथमिकतामा राखेको छ। सीपमूलक तालिम, उद्यमशीलता विकास, स्टार्टअप प्रवर्द्धन, कृषि व्यवसाय, पर्यटन तथा साना उद्योगसँग युवालाई जोड्ने कार्यक्रम सञ्चालन गरिने जनाइएको छ।
"हामी युवालाई केवल भाषण दिने होइन, सीप, अवसर, लगानी, बजार र आत्मनिर्भरतासँग जोड्ने अभियान सञ्चालन गर्छौँ। युवाको पलायन रोक्न स्थानीय स्तरमै रोजगारी सिर्जना गर्नु आजको सबैभन्दा ठूलो आवश्यकता हो," चौधरीले बताए।
घोराहीको अर्थतन्त्रको मुख्य आधार कृषि भएकाले आधुनिक खेती, सिँचाइ, भण्डारण, प्रशोधन तथा बजारीकरणमा विशेष जोड दिइने अभियानले जनाएको छ। किसान, सहकारी, निजी क्षेत्र र स्थानीय सरकारबीच सहकार्य गर्दै स्थानीय उत्पादनको ब्रान्डिङ गरी राष्ट्रिय बजारसम्म पुर्याउने पहल गरिने उल्लेख गरिएको छ।
त्यसैगरी धार्मिक, सांस्कृतिक, ऐतिहासिक तथा प्राकृतिक सम्पदाको संरक्षण र प्रवर्द्धन गर्दै पर्यटन विकासलाई पनि अभियानको प्राथमिकतामा राखिएको छ। पर्यटनसँग होटल व्यवसाय, यातायात, हस्तकला, कृषि उत्पादन तथा स्थानीय उद्यमलाई जोडेर आर्थिक गतिविधि विस्तार गर्ने लक्ष्य लिइएको अभियानले जनाएको छ।
सुशासन प्रवर्द्धनका लागि सार्वजनिक सुनुवाइ, नागरिक संवाद, सामाजिक परीक्षण तथा डिजिटल सेवाको विस्तारमा पनि अभियानले जोड दिने भएको छ। शिक्षा क्षेत्रमा सीपमूलक तथा प्रविधिमैत्री शिक्षालाई प्रोत्साहन गर्ने र स्वास्थ्य क्षेत्रमा गुणस्तरीय सेवा, सरसफाइ, पोषण तथा मानसिक स्वास्थ्यसम्बन्धी जनचेतनामूलक कार्यक्रम सञ्चालन गरिने योजना रहेको छ।
चौधरीका अनुसार निजी क्षेत्र, सहकारी, सञ्चारमाध्यम, नागरिक समाज र स्थानीय सरकारबीचको सहकार्यलाई अझ प्रभावकारी बनाउँदै अभियानलाई जनस्तरसम्म विस्तार गरिनेछ।
"घोषणा गरेर मात्र विकास हुँदैन। नागरिकका सुझाव सुन्ने, समस्या पहिचान गर्ने, समाधान कार्यान्वयन गर्ने र नियमित अनुगमन गर्ने संस्कृतिको विकास गर्न सके घोराहीलाई विकास, उत्पादन, उद्यम, रोजगार र सुशासनको नमुना नगर बनाउन सकिन्छ," उनले भने।
घोराही बनाऔँ अभियानले सबै घोराहीवासीलाई अभियानमा सक्रिय सहभागी हुन आग्रह गर्दै समृद्ध घोराही निर्माणको सपना सबैको साझा जिम्मेवारी भएको जनाएको छ।