काठमाडौं - जापानको आइची-नागोयामा जारी २०औं एसियाली खेलकुद प्रतियोगितामा नेपाली महिला कबड्डी टोलीले कांस्य पदक जितेको छ।
शुक्रबार तोकाइ सिटिजन व्यायामशालामा भएको सेमिफाइनल खेलमा भारतसँग ४८-२४ अंकले पराजित भएपछि नेपालले कांस्य पदकमा चित्त बुझाएको हो।
भारतले पहिलो हाफमा ३१-१७ को अग्रता बनाएको थियो भने दोस्रो हाफमा १७-७ अंकको अग्रता कायम गर्दै खेल ४८-२४ ले आफ्नो पक्षमा पारेको थियो। एसियाली खेलकुदको कबड्डीमा सेमिफाइनलमा पराजित हुने दुवै टोलीलाई कांस्य पदक प्रदान गर्ने प्रावधान छ।
समूह चरणमा नेपालले थाइल्याण्डलाई पराजित गरेको थियो भने चाइनिज ताइपेइसँग पराजित भएको थियो। अन्तिम खेलमा श्रीलंकालाई हराउँदै नेपाल सेमिफाइनलमा पुगेको थियो।
यसअघि सन् २०२३ मा चीनको हाङजाउमा सम्पन्न १९औं एसियाली खेलकुदमा पनि नेपाल भारतसँगै सेमिफाइनलमा पराजित भएको थियो। यससँगै नेपाली महिला टोलीले लगातार दोस्रो संस्करणमा कांस्य पदक जितेर इतिहास दोहोराएको छ।
२०औं एसियाली खेलकुदमा नेपालको यो दोस्रो पदक हो। यसअघि कराँतेतर्फ पुरुष कुमिते ८४ केजी भन्दा माथिको तौल समूहमा तेन्जिङ शेर्पाले कांस्य पदक जितेका थिए।
